நான் அடிமை இல்லை - முனியம்மா

பெண்கள் அடிமைகளாக வாழ்வதில்லை. எல்லோரும் முன்னேறியிருக்கிறார்கள். இன்னும் பெண்ணடிமையைப் பற்றி பேசுகிறாயே? என பல பெண்களே என்னிடம் கேட்டிருக்கிறார்கள். அவர்கள் எல்லோரும் நகர்ப்புற பெண்களின் உடை, வேலைக்கு செல்லுதல் போன்ற விடயங்களை வைத்து மேலோட்டமாகவே யோசிக்கிறார்கள். ஆனால் இன்றும் பெண்கள் அடிமை போல் நடத்தப் படுவது அன்றாட செய்தித் தாள்களில் கிடைக்கப் பெறுகிறது.

அப்படி ஒரு சம்பவம் தான் இது. கிருஷ்ணகிரியில் 15வயது சிறுமிக்கு பால்ய திருமணம் செய்ய ஏற்பாடுகள் நடை பெற்று வந்திருக்கிறது. அந்த பெண்ணின் பெயர் முனியம்மா. பள்ளிப் படிப்பு கூட முடியாத பருவத்தில் திருமண ஏற்பாடு. தனக்கு நிகழப் போகும் கொடுமையை ஏற்றுக் கொண்டு அடிமையாக வாழ அவருக்கு விருப்பமில்லை.

அவருக்கு பார்த்த மாப்பிள்ளை சுந்தரத்தின் வயது 32. என்ன செய்யலாம்? என யோசித்த அந்த சிறுமி தனது திருமணப் பத்திரிகையை மாவட்ட ஆட்சித் தலைவருக்கு ஃபேக்ஸ் மூலம் அனுப்பி உதவி கோரினார். நேரில் விரைந்தவர்கள் திருமணத்தை நிறுத்தி மாப்பிள்ளை மற்றும் பெண் வீட்டாரை எச்சரித்து விட்டு அச்சிறுமியின் முடிவுக்கு பாராட்டுக் கூறியுள்ளனர்.

இன்றும் பலப் பெண்கள் தனக்குப் பிடிக்கிறதோ இல்லையோ வீட்டில் பார்க்கும் மாப்பிள்ளைக்கு கழுத்தை நீட்டி விட்டு அடிமையாக வாழத் துணிகிறார்கள். இது துணிச்சல் என்பதை விட கோழைத்தணம் என்றே சொல்ல வேண்டும். இன்று பலரால் பெண்கள் முன்னேற்றமடைந்து விட்டார்கள் என நினைக்கப் படும் நகர்ப் புற பெண்களிலும் பலர் இப்படித்தான் இருக்கிறார்கள்.

இன்றைய கால கட்டத்தில் கணக்கிட்டால் விருப்பமின்றி நடந்த திருமணங்கள் நிச்சயம் அதிகமாக இருக்கும். இன்றும் வரதட்சினை கொடுமையால் பெண் தற்கொலை போன்ற செய்திகள் தினசரிகளை அலங்கரித்துக் கொண்டுதான் இருக்கின்றன என்பதை யாராலும் மறுக்க முடியாது.

ஆனால் இது போன்று எதற்கும் அஞ்சாமல் துணிச்சலுடன் தனக்கு நிகழவிருந்த கொடுமையை எதிர்த்து வெற்றி பெற்ற சிறுமி முனியம்மாளுக்கு எனது சல்யூட் மற்றும் வாழ்த்துக்கள்.