காதலர் தினமும் மெரீனா கடற்கரையும்

காதல் என்ற வார்த்தையே கொச்சைப்படுத்தப்பட்ட ஒன்றாய் இருக்கிறது இந்நாளில். காதல் என்றால் அன்பு என்பதுதான் பொருள். அது யார் மீது வேண்டுமானாலும் வரலாம். தாய், தந்தை, சகோதரம், நட்பு, சொந்தம் என யாரிடம் வேண்டுமானாலும் வரலாம். ஆனால் காதல் என்ற சொல்லுக்கு சுட்டப்படும் பொருளாக மாறிவிட்டது ஒரு ஆணுக்கும் பெண்ணுக்கும் இடையேயான அன்பு.

இதில் தவறொன்றும் இல்லை. அது இச்சையாக மட்டும் இல்லாத வரை.

காதலென்பது...

நீ வருவாய் என நானும்
நான் வருவேன் என நீயும்
பல மணி காத்திருந்து
இழந்த பல நேரத்தையும்
இன்ன பிற இன்பத்தையும்
சட்டென மீட்டெடுத்தது போல்
இருவரும் சந்தித்து காத்திருப்புக்கு
விடை கொடுத்து அனுப்பினோம்

ஒரு காலத்தில் காதல் என்பது ஒரு தவறான விடயமாகக் கருதப்பட்டுவந்தது. ஆனால் இன்று கள்ளத்தொடர்பைக் கூட பெரிதாக எடுத்துக் கொள்வதில்லை. மெரினா கடற்கரை ஆசியாவிலேயே பெரியது அளவில் மட்டுமல்ல இன்று அங்கு குவியும் ஜோடிகளிலும் தான். இவர்களில் எத்தனை ஜோடி நிஜக் காதலர்கள்?

கணக்கெடுப்பு நடத்தினால் கிடைப்பதென்னவோ 10 விழுக்காடாகத்தான் இருக்கும். "காமம் இல்லாக் காதல் அதுக் காதல் இல்லை" என்பதை பலர் ஒப்புக்கொண்டிருக்கிறோம். ஆனால் இன்று காமத்திற்கு மறுபெயர் காதலா? என எண்ணத் தோன்றுகிறது மெரினா சென்றால். கடற்கரை என்னவோ அவர்களுக்கு விடுதியில் எடுத்த அறை போலத் தெரிகிறது.

பொது இடத்தில்
இச்சைக் கொண்டு
இறுக்கியணைத்து இதழ்
முத்தமிட்டு சொன்னான்
இதுதான் காதல் என்று
இது காதலா? காமமா?
என்றக் குழப்பத்தில் மீள
முடியாமல் அவள்

இன்று வெறும் முத்தத்துடன் நின்று விடாமல் அங்கு நடக்கும் சில்மிஷங்கள் சுண்டல் விற்கும் சிறு குழந்தைகளைக் கூட முகம் சுழிக்க வைத்து விடுகிறது. இப்படி வய்துக் கோளாரில் வருபவர்களும், வயது முதிர்ந்த கள்ளத்தொடர்புகளும் நிறைந்த இடமாக மாறிப் போயிருக்கிறது மெரினா.

வெளியூரிலிருந்து வரும் பெற்றோர்கள் இவற்றைப் பார்த்த பின்பு எப்ப்டி தங்கள் பெண்களை படிக்கவோ அல்லது வேலைக்கோ அனுப்புவார்கள்? அவர்கள் சுதந்திரம் பறிக்கப்படக் கூடும். மெரினாவிற்கு வரும் குடும்பங்கள் அவர்கள் குழந்தைகளுடன் வருகின்றனர். அந்தக் குழந்தைகள் "அம்மா அவுங்க என்ன செய்றாங்க"ன்னு கேட்கும் போது பதில் சொல்லத் தினறி இனி இங்கு வரக்கூடாது என வெறுத்துப் போனவர்கள் பலர்.

அன்பு பரிமாற்றம் என்ற பெயரில் நடக்கும் அவர்களின் முத்தப் பறிமாற்றம் அவர்களின் இச்சையைத் தூண்டிவிட்டு இன்னபிற தவறுகளுக்கும் துணையாய் நிற்கிறது. இன்று அங்கு காதலர்களாய்(?)த் திரியும் எத்தனை ஜோடி மணமக்களாகப் போகிறார்கள் என்றால் மிஞ்சுவது ஒற்றை இலக்க விழுக்காடாகத்தான் இருக்கும்.



அவர்களின் இச்சையைத் தீர்த்துக் கொள்ள மெரினா என்ன லாட்ஜா? அங்கு இருக்கும் கலங்கரை விளக்கம் அவர்களுக்குப் பிடித்த விளக்கா?

பி.கு: மெரீனா மட்டுமல்ல இன்ன்னும் பல கடற்கரை, திரையரங்குகள் இச்சைத் தீர்க்கும் இடமாக மாற்றப் பட்டுள்ளது. என் அன்னை, தந்தை, அண்ணன், சொந்தம், நட்பு, மனிதம், உயிரினங்கள், உயிரற்றவைகள் அனைவருக்கும் நான் சொல்ல விரும்புவது "I LOVE YOU".