பாராட்டு விழாவும் சாலையோர மனிதர்களும்

திரைத்துறையினருக்கு இருக்க இடம் கொடுத்ததற்கு பாராட்டு விழா. இது போல் பல விடயங்களுக்கு தனக்குத் தானே பாராட்டு விழா எடுத்து பணத்தை வீணடிக்கிறார்கள். ஒரு பாராட்டு விழா நடத்த ஆகும் செலவைக் கணக்கிட்டுப் பார்த்தால் தலை சுற்றி விடும். ஒரு சாமான்யனின் ஆண்டு வருமானம் எல்லாம் அங்கு தூசு மாதிரி.

திரைத்துறையினருக்காவது வருமானத்திற்கு வழி இருக்கிறது. ஆனால் தினம் தினம் தெருவோரம், சாக்கடையோரம் வசிக்கும் நம் சக மனித உறவுகளுக்கு என்ன செய்ய யோசித்திருக்கிறார்கள்? எதுவும் கிடையாது. ஏனென்றால் அவர்களைப் பற்றி இந்த மக்களும் கவலைப்பட்டதில்லை, அரசியல் வியாதிகளும் கவலைப்பட்டதில்லை.

சென்ற ஆண்டில் நடத்தப்பட்ட பாராட்டு விழக்களுக்கு செய்த செலவை இவர்களின் நலத்திட்டத்திற்கு உதவியிருந்தால் இது போன்று சாலையோரம் வசிக்கும் 100 பேருக்காவது வீடும் வேலை வாய்ப்பும் வழங்கியிருக்கலாம். தற்பெருமை தேடும் இவர்களிடம் எங்கிருந்து மனிதத்தை எதிர்பார்ப்பது?

பிச்சைக் காரர்கள் இல்லாத இந்தியாவை உருவாக்க எத்தனைத் திட்டங்கள் உருவாக்கப் பட்டிருக்கும்? அதில் எவ்வளவு பேர் பயனடைந்துள்ளனர்? இதை சிறப்பாக செயல் படுத்த முடியாதவர்களுக்கு திரைத்துறையினரின் தேவையை மட்டும் சிறப்பாக செயல்படுத்த முடிகிறது.

காரணம் விளம்பரம்தான். ஒரு பிச்சைக்காரனுக்கோ, சாலையோர வாசிக்கோ உதவினால் அதனால் ஒன்றும் பெரிய விளம்பரம் கிடைத்து விடாது. அதுவே மக்களை அடிமைப் படுத்தி வைத்திருக்கும் திரைத்துறைக்கு உதவினால் உடன் விளம்பரம் கிடைக்கும். தேர்தலில் வாக்குகளும் கிடைக்கும்.

அந்த விழாவில் ஒரு நடிகர் கோபமாகப் பேசி பாராட்டு பெற்றாரம். நடிகர்கள் நடிப்பதோடு நிறுத்தி கொள்ள வேண்டும். சமூகம் சார்ந்த பிரச்சினைகளை அரசியலாளர்கள் பார்த்துக் கொள்வார்கள். அது போன்ற பிரச்சினைகள் நடிகனுக்கு தேவையற்றது என்று பேசியிருக்கிறார். உங்களை எல்லாம் தூக்கி உச்சத்தில் உட்கார வைத்திருப்பது இந்த சமூகம்தான்.

சமூகப் பிரச்சினைகளில் தலையிட வேண்டாம். ஒப்புக் கொள்கிறேன். உங்கள் திரைத்துறையினரிடம் இல்லாதப் பணமா? நீங்கள் அனைவரும் பகிர்ந்து செலவு செய்தாலே உங்கள் துறையில் கஷ்டப் படுபவர்களுக்கு வீடு கட்டி கொடுத்திருக்கலாம். ஏன் அரசாங்கம் கட்டித்தர வேண்டும்? யோசித்தீர்களா?

எங்கள் துறையினருக்கு நாங்கள் கட்டி கொடுத்து கொள்கிறோம். நீங்கள் வீடில்லாத சாதாரன மனிதர்களுக்கு உதவுங்கள் என்று சொல்ல யாருக்கும் தைரியமும் கிடையாது. மனமும் கிடையாது.

இது போன்ற சுயநலவாதிகளுக்கு கட் அவுட், சுவரொட்டிகள் வைப்பதை நிறுத்துவோம். இது போன்ற நடிகர்களுக்கு விழா எடுத்தால் கூட்டம், படம் வெளிவந்தால் கூட்டம் என நம் நேரத்தையும் பணத்தையும் வீணடிப்பதை விடுத்து இனிமேலாவது அவரவர் வாழ்க்கையை பற்றி யோசிப்போம். பணம் அதிகமிருந்தால் இல்லாதவனுக்கு உதவுவோம்.